Operit El Leila El Kebira

بائع: فريرة للعيل.. يا أبو العيال ميل. خد لك سبع فرارير.. زمارة.. شخليلة.. عصفورة يا حليلة.. طراطير يا واد طراطير!

السيرك. المعلن: الليلة الليلة السيرك تعالوا دي فرجة تساوي جنيه قولوا هيه. الأطفال : هيه هيه هيه المعلن: بمناسبه هذا المولد يوجد برنامج سواريه... قولوا هيه الأطفال : هيه هيه هيه المعلن: في السيرك شجيع يهجم ع السبع ويركب دوغري عليه...قولوا هيه.. الأطفال : هيه هيه هيه المعلن: وبنات قمرات زي الشربات حلوين مش عارف ليه... قولوا هيه. الأطفال : هيه هيه هيه المعلن: وكمان بلياتشو تعالوا اسمعوا نتشه وشوفوا هيعمل إيه..قولوا هيه الأطفال : هيه هيه هيه

مدرب الأسود: أنا شجيع السيما.. أبو شنب بريمة أول ما أقول هالى هب وأصرخ لى صرخة "ها ها ها" السبع يتكهرب ويبقى فرخة ! حالا بالا سأصارع أسد إنما أيه متوحش وهخلى وجهه شوارع ! تسقيفة يا ناس ما يصحش ! اهو جه اهو جاه .. تسقيفة بقي .. تسقيفة أمال.. تشجيعة أمال.. تعالى لي لالي لالي يا حبيبي تعالى لي.

دقي يا مزيكا حمار ينهق مزيكا حمار ينهق

الجمهور: هاهاهاهاها مزيكا

بائع: السمك مقلي كل وبرق لي! صنف زي الفل.

بائع: استخار واختار، فشه أو ممبار. يلا سمي وكل.

زفة المطاهر.

نساء: يا أم المطَّاهر رشي الملح سبع مرات. في مقامه الطاهر خشي وقيدي سبع شمعات.

أطفال: يا عريس يا صغير. علقة تفوت ولا حد يموت. لابس ومغير وح تشرب مرقة كتكوت.

رقصة الحصان.

في القهوة

المعلم: بالذمة دا سابع عيل. مزفوف من وقت قليل.

القهوجي: مولد شيلالاه يا معلم. عقبال أولادك.

المعلم: كلمِ.

نداءات: واحد مضبوط واتنين مصري.

القهوجي: ع النار حاضر جايلك دوغري.

يوزع تحيات: مسا التماسي يا مسا التماسي، يا ورد قاعد على الكراسي.

نداء: هات شاي يا دقدق.

القهوجي: عيني وراسي.

يدخل الريس حنتيرة مغن القهوة الصعيدي.

الجميع: سمعنا يا ريس حنتيرة.. للصبح معاك السهيرة.

الجميع: سمعنا.... سمعنا.

حنتيرة: يا غزال يا غزال .. ده العشق حلال .. دوبتني دوب .. خلتني خيال .. يا شفتك فص فراوله ... وانا لا قوه ولا حولَ .. دوبتلي قلبي علي اوله .. اه ياغزال .. العشق حلال .. يارب يا عالم بالحال تهدي حبيبي ويصبح عال و اغني وارقع بالموال ... و اقول يا غزال يا غزال ..

المعلم: وقف ياريس حنتيرة. في ناس هنا قاعدة كتيرة. ولا حد قال هات تعميرة، ولا واحد شاي، المجموعة: ولا حد قال تعميرة ولا واحد شاي.

المعلم: اللي حيطلب رح يقعد. والل ما يطلبش يبعد.

زبون: يلا بنا نخرج يا مسعد شارع الترماي.

حنتيرة:يااا ليل يااا ليل .. يا غزال يا غزال .. ده العشق حلال .. دوبتني دوب .. خلتني خيال ..

يخرجان!

لعبة زق الطارة

صاحب اللعبة : ورينا القوة. يا ابني أنت وهوَ. مين عنده مروة وعاملي فتوه. يقدر بقداره على زق الطارة ويفرقع بمبه.

شاب: وسع وسع وسع. انا ازق الطارة واضرب ميت بمبه. ده انا الاسطى عمارة من درب شكمبة. صيتي من القلعة لسويقة اللالا، انا واخد السمعه.

الجميع: طب يلا تعالى

الشاب: لا يا عم سعيدة.. البدلة جديدة.

الجميع: ههأه ههأه سعيده.. يا أبو بدله جديدة..

خارج القهوة.

الاخر : اوعد يارب اوعد ...آدي كمان قهوة.

الأول : يلا بنا يا مسعد، ندخل على سهوه!

في القهوة الثانية

الغازية: طار في الهوا شاشي وانت ما تدراشي. طرفه شاوري عليك، حكم الهوا ماشي. حكم الهوا ماشي. هوا العصاري. يا واد، على سطح داري يا واد. خدني ورماني رماني عليك ولا أنت داري . آهين يا ناري..منك يا جاري.. خدني ورماني رماني عليك هوا العصاري.

صاحب القهوة: ماشي ماشي .. ماشي كلامك .. اه اللي حيطلب راح يقعد, واللي ما يطلبش يبعد.

الزبون: يلا بنا نخرج يا مسعد شارع الترماي.

فلاح: ناس من بلدنا هناك أهم. روح يا إبراهيم انده لهم.

سلامات سلامات سلامات.. سلامات ع البلديات.

المنشد: ليلتكوا أنس وجلجلة.. إنشد ولعلع يا وله شفت ف منام صاحب المقام. ده ابهه. المجموعة: ده ابهه. المنشد: ويمامه حايمه عليه تسبح ربها. المجموعة: يا نور النبي...يا نور النبي. المنشد: ميلت فوق يده وجيت احبها. المجموعة: أحبها. المنشد: صحوني م النوم خدت بعضي وتني جي المجموعة: ... تني جي. وبعوده وبعوده وبعودة..وبعودة. الجميع : الله حي.

فلاح: دي الحضرة والذكر انجلى. يالله بنا نذكر يا وله.

سيدة: يا ولاد الحلال بنت تايهة طول كده رجلها الشمال فيها خلخال زي ده.

رجل: زحمة يا ولداه. كام عيل تاه.

الجميع: دي الليلة الكبيرة يا عمي والعالم كتيرة. ماليين الشوادر يابا من الريف والبنادر

آذان .