Letras
Nou la été privé d'lanbision
Mé krwa amwin la pa lo rèv i mank
É mwin na konm linprésion
I fé tout pou k'mon rèv i palank
Nou té konm zwazo martin
Prizonié dési baton lékol
Formataz dopi gran matin
Pou dégrinn nout kalité « bwasoutol »
La done anou lang Fransé
An minm tan k'la priv anou d'parol
N'té giny pa di nout pansé
Pars nout pansé té an Kréol
Konm nout lang té intérdi
Nout spontanéyté té intérdi
Nou la rant dan linibision
Ki karaktériz tout nout nasion
Nou la asiz dann fon la klas
Nou la rod maniér pou kamouflé
Lérk la'riv pou mont de klas
Sat té « trop Créole » la rodoublé
Lété pa in fatalité
Falé zis rant dan lo moul
Mé dan zot kolonialité
Nout lidantité zot té i rofoul
Fo dir k'dann fon la klas
Navé mon bann, navé mon nasyon
Nou té i vé dégiz nout ras
Nou la rofiz lasimilasion
Nou, nou té i koz an « Zé »
Métrès té i koz an zétranzé
Pandan k'nou té sèy konprann
Bann ti marmay zorèy té i aprann
Nout somin la, lété pa bon
Nou la pran boulvar lésklizion
Navé pwin lo swa monmon
Navé ryink somin la an n'opsion
Nou la pérd konfians an nou
Souvan pou lo réstan nout vi
Formaté pou viv aznou
Pandan k'zot i ésplwat nout péi
La done référans Fransé
Tout an dénigran la myinn
Ton kiltir va avansé
La myinn sar touzour a la trinn
Fo zot i arèt fé lo ni
Arèt kiltiv lakiltirasion
Mi koné la frankofoni
Sé lo sourir d'la kolonizasion
Tout pèp la bézwin modèl
Son bann prop modèl kiltirèl
Ton modèl i rosanm pa nou
Nou giny pa idantifi anou
Afors déni d'idantité
Tout in pèp lé infériorizé
Ral anou dann médiokrité