Letras
呢年嚟我有幾份兼職
其中嘅一份
係幫啲馬迷落注 喺電話投注中心
喺裏邊我識唔到朋友
返工食飯 都係一個人
我已經悶到抽筋
但要維生 我諗到一個方法抗衡
開閘前半分鐘 總有好急嘅客人
落注嘅時候夾雜粗口 聽到我一嚿雲
但佢哋愈係愈忟 我就愈係斯文
我話：「麻煩你重複一次」
搞到夠鐘開閘 佢就問候我屋企人
佢鬧我正一懵撚 話要叫個經理出嚟問
我都好有禮貌噉回應：「先生，麻煩你等等」
我既緊張又興奮 同時又扮嗮殷勤
喺呢個心情咁複雜嘅搏鬥裏面
我開始搵到工作嘅快感
希獵神話有一個故事
講述西西弗斯受到諸神嘅懲罰
要喺地獄不斷推一塊巨石上山
上到山頂 塊巨石又會自己碌返落山腳
佢每日都要重複呢一種徒勞無功嘅工作 直到永恆
後人有一個講法 話諸神並唔係用「推石頭」嚟懲罰西西弗斯
而係用觀念 用「我永世都要推石頭實在太慘」嘅呢個觀念
西西弗斯知道自己改變唔到命運
佢唯一可以做嘅 就係繼續推石頭
直到有一日 佢發現佢可以藐視呢個命運
甚至用享受呢個過程來去否定諸神對佢嘅懲罰
於是 佢感覺到自己係快樂嘅