Letras
Je pjatk po swjatoku. Steju z awtom w chaosu
Hdyž mam zbožo k wječeri šće dočinju.
Zady mje wulke trubjenje.
Sym sej wusnył. Nětk zas dale dźe.
Dźens' mój šef mje k sebi skazał je.
Prašach so, što zaso wot mje chce?
Kolegojo so wospjet hóršichu,
zo na nuzniku přeco tajnje spju.
Kóžde rano napoł šesćich won.
Wječor pozdźe w póćmje zaso dom.
Dny so runaja jedyn druhemu.
Cyły tydźeń mam jenož wostudu.
Tola sobotu, sobotu so skónčnje zaso wotćahnu.
Najprjedy na jědnatku a po tym do Worklec na dumpańcu.
Tola njedźelu, njedźelu so skónčnje zaso wotćahnu.
Po kemšach na jědnatku a wječor hišće raz do kluba du.
Póndźelu rano budźak zaso rži.
Njejapcy mje w sparje překwapi.
Kónc je són wo bědnym žlókanju.
Konfrontowany sym z realitu.
Wutora a srjeda, štwórtk a pjatk -
kóždy dźeń tón samsny hłupy šmjatk.
Hdźe je zmysł toho wšědnoh bědźenja?
Hdy je skónčnje zas kónc tydźenja?
Tola sobotu, sobotu so skónčnje zaso wotćahnu.
Najprjedy na jědnatku a po tym do Smječkec na dumpańcu.
Tola njedźelu, njedźelu so skónčnje zaso wotćahnu.
Po kemšach na jědnatku a wječor hišće raz do kluba du.
Dźens běch raz pola lěkarja.
Tón pak mi špatnu powěsć da:
Hdyž dale telko piju ja,
budźe moja bórze wudowa.
To mje tak njesměrnje wustróža,
zo je so bleška z ruki sunyła.
A we wokomiku padnjenja
so cyłe piwo wukida.
Nětko sobotu, sobotu zas' strózbny dožiwju.
Kóždy wokomik z połnym wědomjom začuju.
Nětko njedźelu, njedźelu zas ' strózbny dožiwju
a hač na małku jědnatku skoro ničo wjace njepiju.
Tola sobotu, sobotu so skónčnje zaso wotćahnu.
Najprjedy na jědnatku a po tym do Wěteńcy na dumpańcu.
Tola njedźelu, njedźelu so skónčnje zaso wotćahnu.
Po kemšach na jědnatku a wječor na kóždy pad do kluba du.