Текст песни
E Io-nui
Io-roa
Io-te-mataaho
Io-te-matua i Te Toi-o-ngā-rangi
Whakarongo iho, kia aro mai rā
Waerea, waerea
Waerea i runga
Waerea i raro
Ka waerea te papa e takoto nei
Ka waerea te rangi e tū nei
Ka waerea te huanui ki te aka matua
Ka waerea te ara kia aupiki ake ai au ki runga
Ka whanatu, ka whanatu
Ka piki, ka kake
Ki tōna kōtihitihi, ki tōna matatihi
Ki tōna keokeonga, ki tōna akitu
Ka waerea kia eke atu ai ki te kōmata o te rangi
Whano, whano, haramai te toki, haumi ē, hui ē, tāiki ē!
Waerea te marutuna
Waerea te maruwehi
Waerea koi mānukanuka
Waerea koi mānakanaka
Ka waerea koi horokukū
Ka waerea koi wehi
Ka tau te mauri
Ka tū te mauri
Waerea te whātika whakamua
Kia wātea ai i te pō, kia wātea ai i te ao
Ka turakina atu ngā tairo, ka hinga ki tahaki
Ka tau te āio-nuku, ka tau te āio-rangi
Waerea te ara moana
Tahia ngaru nui, tahia ngaru roa
Whakaaiongia te kōkōhau–te hau nui, te hau roa
Ka whakaruhia, ka whakangehea
Kia āiopīpī mai ai taku ara
Kia whakawhiti atu au ki pae tata
Kia ū atu au ki pae kōkēi
Ka toko te koiora i te ao tūroa
Ka puta te ihu ki te ao mārama
Whano, whano, haramai te toki, haumi ē, hui ē, tāiki ē!