Dhum Dhum Dhum Dhum

ധും ധും ധും ധും ദൂരെയേതോ രാക്കിളിപ്പാട്ടിൽ

തുടങ്ങി ഉത്സവം നിലാവിൻ ഉത്സവം

ഗന്ധർവന്മാർ ദൂതയക്കും ദേവഹംസങ്ങൾ

കുടഞ്ഞൂ കുങ്കുമം കുളിർ പൂ ചന്ദനം

മേലേ മേലേ മഴമേഘപ്പാളിയൊരുമിന്നലോടെയുണരും

ദേവദാരുവന ദേവതക്കു മണിമോതിരങ്ങൾ പണിയും

മേലേ മേലേ മഴമേഘപ്പാളിയൊരുമിന്നലോടെയുണരും

ദേവദാരുവന ദേവതക്കു മണിമോതിരങ്ങൾ പണിയും

തണ്ടുലഞ്ഞ കൈത്താരിൽ ചന്ദ്രകാന്തവളയേകും

മഞ്ജുരാഗവീണയിൽ അഞ്ജനങ്ങളെഴുതിക്കും

പൂപുലരിയിൽ മഞ്ഞുമഴ മുത്തു മണിയണിയിക്കും

മെല്ലെ മെല്ലെ നിന്നെ

മുടിപ്പൂ ചാർത്തിടും തലോടാൻ പോന്നിടും

ധും ധും ധും ധും ദൂരെയേതോ രാക്കിളിപ്പാട്ടിൽ

തുടങ്ങി ഉത്സവം നിലാവിൻ ഉത്സവം

സാന്ധ്യ കന്യ ജലകേളിയാടി വരസാഗരങ്ങൾ തിരയും

സൂര്യനാളമൊരു ശംഖുമാല മണിമാറിലിന്നുമണിയും

സാന്ധ്യ കന്യ ജലകേളിയാടി വരസാഗരങ്ങൾ തിരയും

സൂര്യനാളമൊരു ശംഖുമാല മണിമാറിലിന്നുമണിയും

കാട്ടിലേതു കാർകുയിലിൻ പാട്ടുമൂളും മൊഴി കേട്ടു

കാളിദാസ കവിതേ നിൻ കാൽച്ചിലമ്പിൻ ഒലി കേട്ടു

നിൻ പ്രിയസഖി ശകുന്തള വളർത്തുന്ന വനമുല്ല

മെല്ലെ മെല്ലെ നിന്നെ

മണിപ്പൂ ചാർത്തിടും ഒരുക്കാൻ പോന്നിടും

ധും ധും ധും ധും ദൂരെയേതോ രാക്കിളിപ്പാട്ടിൽ

തുടങ്ങി ഉത്സവം നിലാവിൻ ഉത്സവം

സാന്ദ്രമായ ഹിമശൈലസാനുവിലെ ഇന്ദുചൂഢനടനം

പുണ്യമായ ജപമന്ത്രമോടെ ജലഗംഗയാടും നടനം

സാന്ദ്രമായ ഹിമശൈലസാനുവിലെ ഇന്ദുചൂഢനടനം

പുണ്യമായ ജപമന്ത്രമോടെ ജലഗംഗയാടും നടനം

കാറ്റിലാടുമിതളോടെ കൂവളങ്ങൾ കുട നീർത്തി

മംഗളങ്ങളരുളാനായ് കിന്നരൻ്റെ വരവായ്

വിണ്മലരുകൾ പൊഴിയുമീ സരസ്സിലെ അരയന്നം

മെല്ലെ മെല്ലെ പാടീ

വസന്തം പോകയായ് ഹൃദന്തം മൂകമായ്